Уште една брејкинг њуз што ја дознав од Твитер. Нѐ признала уште една земја под уставно име. Која земја? – Тувалу. Ќе бидам искрена, никад чула за земјава. Изгуглав одма, ја најдов на мапа и прочитав на Википедија дека островот е голем колку две дневни соби. Штета што најверојатно никогаш во животот нема овој братски народ да го посетам, но сепак супер. Ќеиф ми е. А баш пред некој ден онака од чиста мира прашав што се случува со нашата “агресивна” дипломатија и дали признавањето на РМ под уставно име запре кај братско Зимбабве. И ова денес кога го чув, си викам бре, Сабина не ми е рамна. А ни тарот карти немам.

Туку друго ми беше муабетот. Тувалу – was that your best shot? Гледав вчера малку снимки од тоа што се случува во Грција. Крш на квадрат. Земјата им е пред крах, полиција тепа народ на сите страни, онака кој им дојде при рака, народот крши наоколу се што ќе стигне – од семафори до контејнери, а бродот тоне ли тоне. Се дискутираше вчера малку на темава и разбирам зошто се гневни. Затоа што некој таму не знаел како да го врзе ќесето, сега тие треба да плаќаат тродупло поголеми даноци. Настрана фактот што не се навикнати да работат како останатите смртници по 40 саати неделно, туку 37.5 и земаат по 15 плати годишно а не 12. Но како и да е, народот го носи товарот. И искрено сочуствувам со нив, сепак со мала доза презир во мене (што од субјективни, што од објективни причини).

Прашањето ми е – нели може македонската надворешна политика и дипломатија некако подобро да го искористи овој момент кога Грција буквално тоне? Или ова е as good as it gets? Политиката е курва и во неа нема место за сочуство. Можеме да сочуствуваме ние обичните граѓани, да споделуваме информации, да блогираме, поддршка да даваме за обичниот народ таму полиција што го тепа. Ама на дипломатијата наша во моментов хиена не треба да и биде рамна. Да гризе онака крвнички. Има уште еден тон такви земји за кои што ние никогаш не сме чуле, и на кои што им е гајле за проблемот на Грците со нашето име. Каде се тие? Зошто нѐ немаат признаено до сега? Што е со братско Џибути? Буркина Фасо? Тие островите таму околу Тувалу што се големи колку 3 а не 2 дневни соби. Што е со нив? Грција да беше на нашето место до сега, они нас ќе ни го имаа сменето името, а не ние нив! Но тоа е. Место за дипломатија, се даваат пари за рекламирање на Агенција за Електронски Комуникации (1 мил. Евра!!!), место за промоција на македонскиот филм надвор (види тука) се фрлаат пари за да влеземе во Гинисова книга на рекорди како земја со најголем број на споменици по глава на жител. Што би рекле твитераши, куглај сине!

П.С. Почитувана екселенцијо, почитуван господине Манчевски, со сета должна почит кон обајцата, за вас имам само еден збор: КИРИЛИЦА!

Да ви кажам искрено не знам од кај да почнам. Имам толку контрадикторни чувства во мене по повод стауиштето, што не знам како да ги сврзам тие мисли и едно логичко следство да оформам. А инженер сум мме, барем за тоа ме биваше, ако за ништо друго.

Но нејсе. Не е тоа битното.

Битното не е драги мои дали сме ние антички Македонци или не. Се живо поминало низ нашиве простори, оставило троа од неговото семе, и продолжило понатаму. А богами и по едно мало Турче лежи во секој од нас. Така да антички да се нарекуваме немаме право, а и словени исто така. Можеме само да се нарекуваме Македонци. Ништо повеќе.

Битното не е ни дали му е местото на плоштад или не. Скопје е грдосија од град, одговорно го тврдам ова, и сите статуи и барокни згради на светов ако ги пресадиме и пресликаме кај нас, тоа нема да ја смени мојата претстава за градот. Тоа не значи дека не си го сакам градот, да не се разбереме погрешно. Мене душата ми се полни кога шетам по скопскиот асфалт. За тоа колку го сакам Скопје пишував и во еден мој претходен пост.

Битното не е ни дали статуата е поголема од околните згради. Јас како некомпетентна на полето на архитектурата и естетиката (естетиката пред се зошто е релативна работа) не можам да дебатирам дали е ок статуата да е поголема од околните згради. Нити пак дали е сеизмички исправна, статички дрн мрн… Архитектите тука можеби ќе се почувствуваат навредени, но како што напоменав претходно, Скопје е грдосија од град, и јас мислам дека ништо на светов нема да му ја смени таа придавка. Така да дали зградите се повисоки, или статуата е сосема ирелевантно.

Битното нажалост не е ни повеќе тоа што таа статуа чини 9 и кусур милиони евра. Имавме избори, најдемократски на свет, со над 70% излезеност на кој што македонскиот народ потврди дека сака статуи и коњи, и тие пари се сосема легитимни и оправдани. Тие пари се исто така веќе платени, и нив нема веќе да ги видиме, исто како што Германија нема веќе да ги види назад милијардите кредит што и ги даде на Грција.

Битното е нешто малку посуштинско.

Битното е што статуата се вика Воин на коњ. Ах македонски народе мој. Сакаш да се онадиш, а да не ти влезе. Простете ми на јазиков, ама нели сум во право? 25 метарска статуа на Александар Македонски да кренеш од чалам и страв да ти биде да ја крстиш, за да не ти се појават Господин Господин Фуере и останатата компанија, чии што жени не знаат како да си ги приберат мажите по дома, па смисолта на животот ја наоѓаат во солење на туѓи манџи, е толку бедно што добивам нагон за повраќање. И немој да сум чула некој да ми излезе со контрааргумент дека тоа му бил само работен наслов. На таквите една бабичка, што сега не е веќе меѓу нас, порано им викаше: “Не треси глупости! Устите со гомна ќе ти ги наполнам.”

Битното е што уште пред Воинот на коњ да стигне во Скопје расклопен на делови како киндер јајце, нашите новинари веќе наголемо не предупредуваа за можните реакции од Елада и нејзиното височество меѓународната заедница. Деновиве нема колумна, нема весник, нема ТВ дневник, а да не слушнам дека нас не опоменале, дека Грција расправала за нас во парламентот, дека сме имале територијални претензии… А реакциите меѓу обичните смртници поделени. Едните потресени, да не стварно не снајде самрак света, а другите со гради широки колку Водно наше, демек глејте, на нас ни е поголем!

Ало? Енибади хоум? Единствена ли сум на светов што ми е преку глава од тоа странски експерти да ми кажуваат што да насадам во сопствената бавча? Единствена ли сум на светов што мисли дека на една земја која што се наоѓа на дереџе да ги распродава сопствените пристаништа и автопати, не и е баш местото да коментира за статуите во главните градови на други земји? Каде е таа меѓународна заедница да и рипне на Грција и да и каже прво да си го среди сопствениот двор, па да мрчи за туѓите? Каква е оваа хипокризија? За едни мајка, за други маќеа. Која е таа арогантност што си ја приуштуваат браќата Грци нас да ни кажуваат какви статуи смееме, а какви не смееме да подигаме?

До кога ќе се тресеме бре што мислат другите? Ако нешто правиш, направи го како што треба, машки. Со мадиња! Или ич не го прави. Од што се плашите? Што ќе ви направат? Ќе ви мавнат по една заушка??? Нема да ви е прв пат, ај ви се молам.

 

За сите оние што се уште се чудат и не им е јасно зошто, еве зошто!!!

Жал ми е. На почетокот кога почнаа протестиве против полициската бруталност си реков бреееее, сто кила млад прогресивен народ, граѓански иницијативи, демократија на дело… абе воодушевена бев. Воодушевена бев. Но сега чувствувам една горчина во устата и една грутка во грлото што нити можам ниту да ја плукнам, ниту да ја голтнам. И тешко ми е.

Поминаа 2 недели откако Мартин Нешковски беше убиен. Се протестира веќе две недели за да се дознае вистината. Јас лично не протестирам за оставка. Јас протестирам да се дознае дали имаше обид за прикривање на убиството. Оставката би следела како логичен потег ако навистина се докаже дека имало таков обид. Но се уште се надевам дека државата ќе ни докаже дека никој не се обидел да сокрие убиство.  Се уште се надевам дека ќе ни бидат одговорени следниве прашања:

• Кој е лекарот што дал наод дека нема физички траги на насилство на телото на Мартин Нешковски
• Кои се луѓето што му помогнале на Игор Спасов да го премести телото и му дозволиле да си замине од местото на злосторот, без притоа да го пријават
• Зошто случајот не е заведен во дневниот билтен на МВР на 06.06.2011
• Како не знаела полицијата за случајов кога полицискиот центар 192 уште вечерта известил дежурен истражен судија за дека има мртво момче чие тело е преместено
• Бил или не бил Спасов на должност кога го убил Мартин (има слики од него во 00.10 часот покрај премиерот, и покрај тврдењата дека имал усна наредба да биде на должност до 24 часот)

И јас си мислев дека поголемиот дел од народот ги мачат истиве прашања. Но не ги мачат. Нажалост повеќе ги интересираат промотивни понуди од Игуана Турс и секојдневно се во неизвеснот што ќе се случи со Цеца и затворот. А оние кои што ги мачат истиве прашања како мене, полека ја губат целата енергија  за протестирање од пусто објаснување дека фамозниот Сорос (за кој што сум убедена дека ни 10% од населението знае кој е) нив не ги финансира.

И разбирам дека за една владеачка гарнитура е многу тешко да ти се случи ваков скандал. Дека ќе се обиде на секој начин да се дефокусира вниманието, и тоа ми е јасно. Но да се организираат контрапротести против протестирачите, претставувајќи се како вистинските протестирачи е стварно многу ниско. Жал ми е за Биљана. Се нашминкало девојчето, се дотерало за пред камера. Нејзините 5 минути слава. И дале напишан текст да чита, ама од пуста трема девојчето звучи како 7 годишно дете што ја рецитира “Брзај брзај прваче…” Не и беше нејзе прв пат на телевизија, има Биљана веќе искуство, но со неизвежбан текст не се оди пред камера туку така. И откако некако успеа да го прочита текстот, се нацртаа утредента партиски војничиња со сокчиња и сендвичи на Мајка Тереза. Прашани кој е нивниот став во врска со случувањата тие одговорија: “Пааааа, нашиот став е …. да стоиме тука…” И тие нели, целите дотерани, знаеја дека ќе има камери, па нека ги личи на телевизија. На Фејсбук настанот за контрапротестите одржани денес, фрштеа коментари строго поврзани со полово општење со мајките на неистомислениците. За тоа дека младо дете е убиено, збор не стана. Само декларативно во описот на настанот.

Си викам: Кои се тие родители? Кои се тие родители што дозволуваат при вакви валкани партиски игри нивните деца да бидат искористени како војници во први борбени редови кои што секогаш гинат, а нивниот генерал да стои позади нив, на сигурно. Не беа некои од нив ни сигурни како се вика убиеното момче! Кои се тие родители што не успеале да ги научат своите деца простопроширени реченици да сврзуваат? Кои се тие родители што им дозволуваат на своите деца некој друг да мисли за нив? Кои се тие родители што им дозволуваат на своите деца така вулгарно да се изразуваат? Мене со моите 28 години  се уште ми е срам вулгарно да се изразам пред моите родители, макар било тоа и кога раскажувам виц. А и на нив пред мене! Кога бев помала не смеев ни да помислам на такво нешто. А кога ќе се обидев да се направам важна и ете да докажам дека и јас сум кул и смеам да пцујам пред моите родители, ќе добиев од време на време една преку уста. Чисто превентивно. За да не ми се случи друг пат. И мене стварно не ми е јасно од каде толку поган јазикот на тие млади деца. Не одат ли во школо? Нема ли таму професори? Психолози? Терапевти? Не гледа ли ова општество дека има тука суштински проблем на неедуцирана младина со хоризонти што стигаат до нивната черга од пред врата. Дека само тоа умеат, да се маваат во гради кога на нивниот митинг ќе дојдат повеќе луѓе отколку на другиот.  Многу ми е жал. Многу!

6 дена откако Мартин Нешковски беше убиен, претседателот на Република Македонија конечно излезе во јавноста и даде изјава. Еве ја неговата изјава:

„Тоа е за осуда навистина, сето она што се случи, институциите ја добија пораката што им ја упатија граѓаните. Тие постапуваат согласно како што спомнав нивните овластувања и да се надеваме, дека се ќе биде како што е согласно од сите акти на државата согласно законот. “ (Извор: А1Телевизија)

Прв пат кога ја прочитав реакцијата негова, не знаев што да помислам. Не побуди ова кај мене ни негирање, ни одобрување, ни смеа, ни револт… ништо! Си реков ај пак да прочитам. И прочитав:

„Тоа е за осуда навистина, сето она што се случи, институциите ја добија пораката што им ја упатија граѓаните.”

И тука застанав. Институциите ја добија пораката што им ја упатија граѓаните. Дали со ова претседателот сака да каже: Да, ве разбравме што сакате, некој навистина мора да сноси одговорност? Или сака да каже: Ок, протестиравте што протестиравте, сега доста е, оставете не на раат да си ја вршиме работата? Или нешто трето? Стварно не ми е јасно…

Многу од моите интернационални пријателчиња, кога видоа како спамирам на Фејсбук со линкови до сајтови со чудни букви и кога видоа дека си ја сменив сликата на профилот ме прашаа: Јована, што се слушува во Македонија? Накратко им ја објаснив случката со убиството на Мартин Нешковски. Ова се нивните реакции и моја лична анализа на нивните првични инстант реакции.

Русинка: Е добро де. Полицијата убила човек. Што се потресуваш толку. Ништо не им можеш.

Очигледно свеста за слобода на говор кај нив не е на највисоко ниво. Дали поради тоа што им е страв, или не е развиена не знам. Но тоа што знам е дека таму власта е прецентрализирана и на олигарсите не им може никој буквално ништо.

Иранец: Само еден е убиен?

Ова беше негова инстант реакција. Не му е лесно и на него. Видел многу полошо. Минатата година во зелената револуција во Иран власта убиваше млади деца, само заради тоа што Махмудинеџад не сакаше да го признае изборниот фалсификат. Протестираа еден куп млади прогресивни деца и не успеаа. Многу од нив беа убиени, а Махмудинеџад е се уште на власт.

Германка: Како тоа 2 дена не се знаело кое е момчето и случајот не бил пријавен?

Луѓето од оваа земја се научени институциите да им функционираат под дифолт. Нејзе не ја интересираше како можел полицаец припадник на специјалони единици да убие дете, туку ја интересираше како е можно ваков случај да се сопне низ институциите на системот.

Хрват: Jaooooo, policija ce nas u groblje otjerati

За ова немам коментар и не знам што да мислам. Излгеда е поборник на A.C.A.B теоријата

До кое ниво сме ние се уште не можам да диференцирам. Се изнаслушав секакви коментари деновиве, и позитивни, и негативни, и глупави, и паметни, и конструктивни и анархистички, и револуционерни, и конзервативни. Секакви. Едни ме убедуваа дека снимката со мајката на Мартин била спин, други ме наклеветија дека сум кодош на државата и ми залепија етикета опозиција (читај СДСМ), трети ми честитаат за упорноста и трудот што го вложувам, четврти негодуваат што се залагам и во странство да се дознае за случајот. Кој е соодносот на луѓето со вакви ставови не знам.

Денес се појави и Феjсбук настан кој што објавува дека во Сабота протестот ќе добие форма на СЛОБОДЕН КОНЦЕРТ. Моите чувства кон ова се измешани и некако не можам да заземам став. Од една страна целата сум лав, пис енд хепинес, имам дури и ѕвонарки и ленонки (жими се), но од друга страна да се организира концерт при случај на смрт некако ми е... Не знам. Одлучете си самите. Јас искрено став по ова не можам да заземам. Мозгав, мозгав и ништо...

Имав вчера и видео чет со продуцентка на шоу што се занимава со работи поврзани со социјални медиуми од Al Jazeera English. Случајно разбрала за Мартин Нешковски, не знам како налетала на мојот блог, го превела со Google Тranslate, и ме контактираше зошто сакаше да дознае повеќе информации. Ако случајот оди во емисијата ќе ве известам.

Имав и вчера мала дискусија на тема дали е во ред странските медиуми да дознаваат за тоа што ни се случува дома. Некои мислат дека си ја црниме државата со тоа. И ги разбирам. Не е убаво за една држава да се знае дека државниот апарат се труди да сокрие убиство. Целиот свет, и покрај ЕУ-НАТО интеграции не гледа како заостанато општество. Некои не знаат ни каде се наоѓаме. Ме имаат и дури прашано дали во Македонија имаме чоколадо. И јас како секој добар гастарбајтер се обидувам некогаш со тешки маки, некогаш иронично и со потсмевање (како на пример на прашањето со чоколадо) да им објаснам дека и ние сме модерно општество. Дека имаме и села што немаат канализација, ама дека не се тие одраз на целата држава.

Јас искрено мислам дека ширењето на веста дека прв пат во Македонија се случуваат протести кој што не ги организира никој - ака подигнато ниво на свест кај народот - ќе покаже дека имаме глави кои што не ни се само за на рамења и за фризури, туку дека знаеме да ги употребиме кога ќе ни затребаат. И покрај тоа што многу луѓе имаат предрасуди кон Арапите, нивниот став кон Тунис и Египет се смени после арапската пролет. Не сакам да се случи македонска пролет. Не сакам револуција. Сакам да им се смени мислењето за мојата држава. Сите оние со поинаков став имаат право да го имаат истиот. И го почитувам нивното мислење. Peace to you all!

П.С. Сакам јавно да упатам пофалби до @Vnukot кој што на неговиот блог објави фоторепортажи од протестите, какви што не направи ниеден весник, ниедна телевизија, ниеден онлајн портал. Македонска верзија и англиска верзија.

Изминативе неколку дена сум фасцинирана, многу горда и тажна во исто време од општествените движења кои што се случуваат во мојата мила татковина, а во која што за жал јас не сум во моментов. Сведок сум на една мирна онлајн револуција на млади умови кои што и покрај недостатокот на информации и купот шпекулации кои што кружеа во понеделникот, одбија да останат неинформирани. Одбија да останат неинформирани, се самоорганизираа, буквално самоорганизираа, и допринесоа вистината да излезе на виделина.

Како се самоорганизираше таа онлајн заедница и како придонесоа поедини индивидуалци? (сигурно има и повеќе, јас ова успеав да го соберам како материјал)

Откако сите станаа свесни дека нешто е матно @ribaro направи специјален блог http://justiceformartin.blogspot.com/ во кој што рачно вметнуваше објавени текстови од македонски блогери во врска со смртта на Мартин Нешковски. Одозгора на се на твитер изјави дека мајка му ја давала целата нејзина поддршка на младите на протестот и се карала по комшики. Сакам во оваа прилика да и упатам искрен срдечен твитерџиски поздрав на мајка ти!

@necoski i @banekoma во заедничка онлајн колаборација изработија постер за повик на протест. Постерот е објавен на блогот на @necovsi http://aerodromskison.blogspot.com

@mkrobot самоиницијативно направи истражување и објави збир на слични вакви случаи, хронолошки сортирани, од 2006 до денес. Листата е објаввена на: http://www.time.mk/info/brutalnost

@stariot објави слика во која што јасно се гледа дека ова е самоорганизирање, дури и кога станува збор за собирање пари за батерии, мегафони и слично. Сликата е објавена на: http://twitpic.com/58domv

@Vnukot објави одлични репортажи од протестите на неговиот блог http://babamitrajanka.blogspot.com/ и објави видео, кое што беше објавено дури и во угледниот WashingtonPost. Додека цела Македонија не знаеше дека има протести или не знаеше зошто се протестира, веста ја објави многу угледен странски медиум.

@kuzevski со мобилен телефон 46 минути (!!!) вршеше стрим во живо од протестите пред собрание. Благодарение на ова, јас буквално се чувствував како да сум таму. Линк до стримот: http://bambuser.com/channel/kuzevski/broadcast/1724323

@davcevski направи фоторепортажа каква што немаше направено ниеден фотограф од ниеден медиум. http://www.flickr.com/photos/skopje-protests/ 

На @radiomof во Средата одеше одлична емисија за тоа како млади, наивни и неискусни млади луѓе ги претркаа традиционалните медиуми благодарение на новите технологии. Подкастот може да го слушнете на следниов линк: http://komunikacii.net/06/09/podcast-11/

На блогот http://novica.softver.org.mk/ (не знам кој твитер корисник е авторот, нека се пријави ако сака, ќе вметнам) авторот самоиницијатино пишува темплејт писмо, го печати во голем број примероци и ги повикува сите кои што се во можност да дојдат таму и таму во толку и толку часот да си земат копија, за да ја испратат по пошта до релевантни фактори, институции, партии, поединци... Авторот дури и објави слика од него, за да знаат луѓето да го препознаат, а откако луѓето (според него 30-ина на број, од кои шо мал дел познавал) се појавија, публикуваше и слики како доказ. За да им се разбие сомнежот на оние скептиците дека самоорганизација не функционира.

@bvelkovska, новинарка во Нова Македонија објави текст за оваа заедница од млади луѓе, кој што јас ќе го испечатам, урамам и закачам на ѕид да ми служи за инспирација секој пат кога ќе ми се вртат црни мисли во глава дека нема надеж. Текстот носи наслов “Децата на цвеќето”.

Ако сум пропуштила некој простете. Јас со ниеден од овие луѓе не се знам лично, но чувствувам како да ги знам цел живот. Зошто по убедување, ставови и акции комплетно соодветстуваат на моите.

На крајот, еве и мој мал придонес, збир од линкови до странски медиуми, каде е објавена веста за Мартин Нешковски. Секако, заслугата за објавувањата не е моја, тоа се еден куп интернетџии кои што константно известуваа редакции, праќаа мејлови,кликаа upvote и слични активности за да се крене онлајн рејтингот на веста.

WashingtonPost: Hundreds protest Macedonian beating death
Бугарија: 22-годишен младеж е починал след като бил пребит от полицаи в центъра на Скопие
Грција:
Σκόπια: Διαδηλώσεις ενάντια στην αστυνομική βία με αφορμή το θάνατο νεαρού
Србија: Skoplje: Mladića na smrt prebio specijalac
Хрватска: MUP dva dana skrivao ubojstvo: Makedonci traze pravdu
Русија: Выборы в Македонии не обошлись без жертв (линкот ми е малку сомнителен поради 4С симболите, но на руски е објавена веста)
Полска: Macedonia: Protesty po zabiciu przez policję 23-letniego mężczyzny
CNN: Protests against Police Brutality in Macedonia
Пакистан: Macedonia: Protests Against Police Brutality to Continue
Италија: continue proteste contro la brutalità della polizia: Macedonia
Франција: Macédoine : Mobilisation des internautes contre la dissimulation d'un meurtre par la police
Словенија: Policisti ščitili kolega morilca?
Романија: Un tanar ucis 'cel mai probabil' de politie la un miting electoral din Macedonia
Португалија: Macedónia: Continuando protestos contra a brutalidade policial

Не сум горда што во странски медиуми се објавуваат вакви вести за мојата држава. Горда сум на нас, што спречивме случајот да се заташка и што полека но сигурно ја изборуваме правдата. Двигател на секое општество е неговата младина. Таа е тука за да ги поправи политичарите кога грешат. Зошто човечки е да се греши, а и човек со моќ во раце не се однесува исто како кога ја немал моќта. Да ги потсети дека низ историјата светот бил придвижуван од идеали, а не од пари. Некои погрешни, некои конзервативни, некои прогресивни. Ако идеалите ни се грешни, нашите потомци ќе учат од нашите грешки. Ако ни се конзервативни, нема да бидат прифатени од модерното општество. Ако ни се прогресивни, нашите потомци нема да мораат да се борат за да ги остваруваат своите идеали. Јас типувам на третото. Вие?

Сакам да посочам на неколку моменти . Едните се за подразмислување, а другите за донесување заклучок.

Момент број 1: Изјавите на министерката Гордана Јанкулоска и премиерот Никола Груевски во врска со тоа дали Спасов бил на службена должност кога го убил Мартин Нешковски

Министерката Гордана Јанкулоска: Игор Спасов имал усна наредба да врши обезбедување на плоштадот до 24 часот (Извор: Алфа телевизија, клик тука)

Премиерот Никола Груевски: Игор Спасов не бил на должност кога го убил Мартин Нешковски (Извор: Канал5 телевизија, клик тука)

Хинт: Ако се уште не сте почнале да подразмислувате, убиството се случи во 00:40 часот.

Момент број 2: Портпаролот на МВР Иво Котевски и директорот на судска медицина Алексеј Дума даваат контрадикторни изјави во врска со запознаеноста на полицијата за случајот

Алексеј Дума: За време на обдукцијата (Понеделник, 06.06.2011)  беа присутни претставници на МВР (Извор: Алфа телевизија, клик тука)

Иво Котевски: Таков настан воопшто не е пријавен во МВР (Понеделник, 06.06.2011) (Извор: А1 телевизија, клик тука)

Момент број 3: Контрадикторноста околу усмената наредба за вршење должност.
ЕСЗ „Тигар“, велат се активира исклучиво со писмена наредба за „вонредно обезбедување“ и исклучиво за тоа треба да има изготвено план за дејствување, поради задолжително хиерархиско потчинување и преземање на полициски активности. (Извор: А1 телевизија, клик тука)

Министерката Гордана Јанкуловска: Игор Спасов имал усна наредба да врши обезбедување на плоштадот до 24.00 часот. (Извор: Алфа телевизја, клик тука)

Момент број 4: Двајца му помогнале да го одвлечкаат телото кај Мепсо, од каде што викнале помош. Спасов си заминал кратко потоа. Кога дошла брзата помош, само констатирала смрт кај Мартин. Портпаролот на МВР 12 часа после убиствтото изјави дека таков случај во МВР не е пријавен. (извинете што немам извор овде, ова го имаше во неколку дневни весници и телевизии; прекумерното сурфање на интернет овие 4 дена ме доведе до тоа да не знам ни мејлот да си го отворам)
Хинт за размислување: Кои се тие двајца и зошто (доколку навистина случајот не бил пријавен во полиција, не сакам ни да помислам на варијантата дека портпаролот на нашето МВР во официјална изјава за медиумите свесно лаже)повеќе од пола ден не пријавиле убиство во МВР.

Не покажувам со прст на никого. Не донесувам заклучоци јавно. Ви презентирам факти. Заклучоците донесете ги сами.

Јавно ги повикувам сите членови на партии, позициски и опозициски да излезат денес, 08.06.2001 на протестот пред Мајка Тереза во 18.00 часот и да покажат дека правдата и човечноста ја ставаат пред партијата. На оние опозициските нека не им биде страв дека на протестот ќе му се додели политичка димензија. На оние позициските нека не им биде страв дека родителите ќе им ги избркаат од администрација. Оние од другите националности нека покажат дека човечкиот живот е подеднакво битен, независно од националноста.

Но нека дојдат на протестот како граѓани, а не како претставници на своите политички партии. Нека покажат човечност, да бидеме еднаш во историјата обединети по прашање за кое што не смее да се има поинаков став.

Пред малку беше соопштено дека за време на обдукцијата имало присутни полицајци. Зошто портпаролот на македонското МВР изјави дека со таков случај не е запознаен?

Излезете сите до еден и борете се против корумпиран трул систем. Против репресија. Против перењето на мозок. Знаењето а моќ! Не дозволувајте некој тоа да ви го одземе! А ако некој се обиде да ви го одземе, спротивставете му се, макар била тоа и вашата партија. Освестете се, пробајте да размислувате со сопствената глава. Не со онаа со која што ви е наложено. Таа не е таму само за да ви стои на рамења.

Воедно го повикувам господинот Драган Павловиќ - Латас да си ги спакува куферите и да си оди од државата. Засекогаш. За негово добро. А и за наше. Јас никогаш во животот никому немам посакано лошо, но такви клетви ми се вртеа во глава за него и неговите медиуми минативе два дена, што се срамам од самата себеси. Има доволно пари. Нека си купи некоја куќа покрај плажа на море и нека срка Секс он д бич под палми. Ќе биде посреќен од сега. А и ние исто така. Такви новинари НЕ НИ ТРЕБААТ. И волкот сит и овците на број!

Бесна сум. Многу сум бесна.

Лично јас, не барам расформирање на специјалните единици, и покрај тоа што знам каков е профилот на тие луѓе таму. Личен контакт со нив не сум имала, фала богу, и се надевам дека никогаш во животот нема ни да имам. А и Скопје е многу побезбедно откако се воведоа тие специјални единици (простете на мојата неинформираност за разликите, но мене алфи, тигри и желки ми е едно исто). Но таа збирштина од бивши криминалци мора да се доведе во ред и да има поголема контрола. Зошто волкот го менува крзното, но сојот не!

Бесна сум на медиумите. Се симнаа подоле од дното. Ве прашувам јавно: Каде ви е душата? Ќе го земам за репер објективниот весник Вечер. Тој пред два дена објави штура информација дека е најдено мртво момче пред зградата на Мепсо, кај кое што лекар првично не нашол траги на насилство. Судска медицина излезе со извештај дека момчето било претепано, со скршен нос и здробена лева страна од телото. Ве прашувам јавно како, како што самите велите и се фалите, објективен медиум, зошто не сакам ни да помислам на варијантата дека свесно во дневен весник публикувате лаги и дека тој дел од приказната ви е измислен: Кој е тој лекар кој што при здробено тело и скршен нос не увидел траги од насилство? Таков лекар не заслужува да има лиценца. Сигурно го знаете, а за објавување афери сте први, повелете објавете го со име и презиме лекарот кој што не констатирал траги од насилство, да се жигоса за цел живот.

Бесна сум што политички партии се пикаат таму каде што не им е местото. Ако сакаат да протестираат, нека повелат. Нека не се сликаат како пауни пред камери. Нека си стават прст на чело и нека размислат два пати. Не се работи овој пат за црква на сред плоштад, па ајде ќе се буниме, се работи за убиство на младо дете од страна на полицијата.

Бесна сум што 3 дена МВР не излезе со информација кои биле луѓето што биле заедно со убиецот. Тој не бил сам, викнал колеги, телефонирал, покривале тело со ќеса.... што ти ја знам. Заборава целата јавност дека самиот чин на прикривање на кривично дело е кривично дело!

Бесна сум што голем дел од младината штуро и немо гледа од страна, не заземајќи став од страв да не биде етикетирана. На Твитер вчера еден дечко кажа и дека многу негови другари не можеле да дојдат на протестот, заради тоа што нивните родители работеле во администрација (нели партиски поставени) и од партија им било наложено да си ги чуваат децата дома под клуч. Простете ми на јазиков, ќе си дозволам да бидам вулгарна, ама кој решил да пуши редно е и да голтне.

Но на крајот на краиштата горда сум. Горда, зошто сум дел од онлајн заедницата која придонесе за излегување на површина на вистината во врска со убиството на младиот Мартин. И некои ќе речат дека нема место за чувствување радост во овој момент. И се сложувам. Човек е убиен од официјално лице. Но да не бараа младите прогресивни умови на оваа држава одговор, вистината немаше да излезе на виделина. Никогаш. Ова го тврдам одговорно со сиот ум што го имам, зошто целата јавност е сведок дека им требаа нецели два дена да го објават убиството. А под притисок на јавноста, за неколку саати и да го решат.

Нема да мирувам, и нема да мирувам додека сите до еден кои што се одговорни за случајот - за неговото постоење како и за обидот за негово прикривање - нема да сносат одговорност.

-----------------------------------------------------------------------------------

Неколку часа по објавување на овој пост беше објавено дека полицаецот тепач ќе одговара за убиство. Според изворот:

Спасов, заедно со уште двајца колеги кои биле во близина, го однеле детето на паркингот пред МЕПСО, кога видел дека момчето не дава знаци на живот.
Потоа викнале Брза помош, Спасов си заминал од местото, а останатите полицајци останале да ја чекаат Брзата помош, која по пристигнувањето само констатирала смрт кај момчето.

Ќе потсетам само дека прикривање на кривично дело е кривично дело, и дека мора да се дознае кои биле тие двајца заедно со Спасов што не го пријавиле случајот!

Победа за македонската твитосфера! Победа за македонските твитерџии! Победа за младите прогресивни луѓе од оваа држава кои што одбиваат да сркаат лајна и покрај тоа што им се сервираат на тацна.

Вистината е откриена. Млад недолжен живот е згаснат поради бруталноста на македонските специјални единици. Посакувам што поголем одзив на протестот пред Мајка Тереза. Не сум физички присутна таму, но со срце и душа ве поддржувам.

Сите медиуми кои што вчера одбиваа да истражат што се случило и сите оние кои што свесно се трудеа да пласираат дезинформации (Цитат од Вечер: “Од страна на лекар, првично било констатирано дека на телото на починатото момче немало видливи траги на насилство” – а младичот не само што имал траги на насилство, туку бил и претепан) слободно можат да се распуштат и да одат да садат компир. Македонската Твитер заедница има доволно млади прогресивни луѓе кои што во моментов за без пари се бават со истражувачко новинарство и придонесуваат вистината да биде слушната. А МВР да објасни зошто вчера тврдеше дека траги од насилство кај детето немало. ОДМА!!! Сочуство до родителите, фамилијата и пријателите на младиот Мартин. Нека почива во мир.

Вака турбулентен ден не памтам не знам од кога. А замислете, ситуацијата ја пратам само преку социјални медиуми, и тук там по некој медиум. Тук там, зошто bandwidth-oт на сите македонски онлајн портали, весници и телевизии е несоодветен за толкава побарувачка по информации, каква што имаше денес. Ваков крах на онлајн медиумите се нема случено од смртта на Тоше.

Како прво, ВМРО победи. Точка. Сите лавови, статуи, куполи и колонади сега се легитимни, повторно им дадовме право да го планираат и трошат буџетот на РМ, и сега не ни останува ништо друго туку да си ќутиме. Сите утешувачки коментари на СДСМ-овци дека направиле супер резултат се излишни, зошто стварно треба да си коњ, покрај толкаво незадовоство на народот да не успееш да ја симнеш власта. Искрено, мое лично субјективно мислење е дека пресуден беше моментот, кога се отвори Бранко во врска со жените на стечајците. Тогаш СДСМ ги загуби сите оние кои што ќе гласаа за нив, само за инает на ВМРО.

Како второ, Љубе уапсен. Фатен со 100.000 Евра во кеш. Во сред град, во сред центар, на сред бел ден. И додека Сител не пропушти да каже дека “после дознавање на веста за апсењето, голем дел од членството на Обединети за Македонија побарало да премине во ВМРО”, СДСМ-овци кукаат од страна, демек тражили сте, гледајте. Престанете да поддржувате се живо што е против власта. Тоа е истиот оној налудничав Брат Љубе со шешир на главата што пред неколку години од небрежност застрела новинарка. Бивш министер за внатрешни, фатен со сто кила кеш мито. Ако бивш министер не знае како функционираат тајни служби и дозволи да биде наместен, ич ама ич не го жалам. Не се бунете за тоа кого уапсиле. Бунете се за тоа кого НЕ уапсиле. Ален Зекиров се уште слободен се шета низ град. А Ален не беше фатен со еден куп кеш во раце. Ален на сред бел ден со 160 км/час прегази човек на пешачки. Да повторам, лично немам ништо против човекот, нит го знам нит го познавам. И знам дека може и да го јадам некој ден што волку многу бабури јавно јадам за него, но сакам правда. Не може за мито да се лежи затвор, а за убивање човек не! Не мора да лежи затвор. Нека му опнат казна месец дена да превезува стари лица преку пешачки, душата ќе би биде мирна, и ќе знам дека каква таква правда е задоволена. Зошто секој пат кога ќе го превезува старото лице преку пешачкиот, ќе мора да си повтори дека на пешачки премин пешаците имаат предност.

И како трето, момче убиено од страна на Алфите во сред центар. Сите молчат. МВР молчи, суд молчи, провладини телевизии молчат, антивладини телевизии пуштаат снимки од очевидци, млади луѓе се собираат во сред центар, ќе кампуваат таму цела ноќ, улици затворени… Се работи за човечки живот. Не сакам да шпекулирам, но нити негови другари, познаници, роднини, родители не се огласија во јавноста. Или се ќути заради страв, или ова е морбиден обид на извесни структури за правење нереди. Не знам од овие две зла кое е помалото. Ќе потсетам само дека пред година-две братска Грција гореше заради ваков случај. И тоа немаше врска нити со позиција, нити со опозиција, нити со корупција. Имаше врска со бруталноста на полицијата, која што кај нашите Алфи не е за потценување. Јавна тајна е дека алфите се збирштина од бивши робијаши, криминалци и слично. И како такви за фаќање и гонење на сличните на нив се супер. Но, бесно куче кога ќе го пуштиш од ланец, не бира кого ќе касне. Или поголема контрола, или распуштање. Зошто, ако се продолжи вака, матрикс ефект не ни бега.

-----------------------------------------------------------------------------------------

07.06.2011

Фејсбук страната “Стоп за полициската бруталност” е скината. Недоволна причина за сомнеж? Фактот дека провладините медиуми не објавуваат ништо, или нафрлаат во 3 реченици дека само е починато момче на плоштадот, но не и убиено е недоволна причина за сомнеж? Пред неколку години Сител успеа да се сопне на класична интернет мамка и објави дека Анџелина Џоли починала во Сен Тропе (или Кан, или не знам кај беше). Значи до брејкинг њуз знаат да стигнат, макар биле и лажни. Од се срце посакувам ова да е намештаљка. Зошто ако не е намештаљка, Сомалија не ни е рамна. А со Сомалија владеат пирати.

Ова не е тажен ден за демократијата, за човековите права, за слободата. Ова е тажен ден за новинарството во Македонија. Имам право да бидам информирана, а од лавината на различни информации кои што стигаат од секаде, не знам на што да поверувам. 

Ете се случи и тоа, бев на Југо журка. Газдата на еден кафич овде, за кој случајно пред година дена дознав дека е Македонец, не покани на Балкан Парти во средата вечер. Ќе имало и специјален диџеј од Франкфурт….

Се нацртавме таму јас и другачка ми Инес од Русија во 10 и кусур. Стоиме надвор да извидиме ситуација, и слушам ја внатре пичи “Тек је 12 сати”. Леее си викам, песме моје младости, ајде да влегуваме. Таман да влеземе, таа калешот на врата ни вика: 5 Евра влез.   Добро, кад се мора мора се. Додека да извадиме парите и платиме, заврши песната. Само што влеговме, и ете ти ја Весна Змијанац пее за јорговани. Мене уште одма почна да ми смрди и веќе 100 пати се имав покајано за 5-те Евра што ги дадов, но налет. Што е тука е.

Навлегуваме едно цели два до три чекори подлабоко во кафичот, и сите што беа таму како да ни го пратеа секој наш чекор. Нови фаци меѓу сталните гости. Инес уште од одма ја баталија, не им беше интересна, ја намирисаа дека не е балканка. Погледот нејзин ала Алиса во земјата на чудата кажуваше се. Јас се уште им бев привлечна. Од каде ли е, од кога е тука, зошто не сме ја виделе порано… такви мисли мора да им се вртеа во глава. И додека Инес се уште се трудеше да ги класифицира гласовните фреквенции на Змијанац, јас го здогледав диџејот од Франкфурт – еден младич кој што се наоѓаше во екот на неговиот пубертет. Јас да одам до шанк да земам пиво, а Инес веќе видно уплашена ми вика: Јована, не ме оставај сама! И викам, ова завивачкиве фреквенции нека не те плашат во позадина, то су све фини поштени људи. Дојдоа по некое време и едни пријателчиња мои Бугари, кои што меѓу другото си ја испеаа Цеца од А до Ш. Тоа е многу порно глетка морам да ви признаам, да гледате како бугари пеат српски турбофолк. Има нешто перверзно и еротично во тоа, не знам…. На Лепи громе мој ја стиша диџејот музиката, и рикна цел кафич на глас, а Инес збунето стоеше до мене. Ми вика: Што се случи? А јас и викам: Не се секирај се ближиме кон кулминацијата. Едни маж и жена десно од мене си се гушкаат и си пеат ли пеат, со еден мерак голем колку Шар Планина, а од лево едни копиљаци со сто кила злато на вратот се дерат: Брате Србинеееееееееее!!!!

Ок, време е да одпаузираме, да одмориме уши. Правац надвор, а надвор збирштина од Руси од Казахстан. Другари и другарки на вратарот. Сите кој од кој, жив доказ за Дарвинова теорија. Кога ги слушна Инес што муабет прават, ми рече: Батали, не можам ова да го слушам, подобро беше завивањето внатре. Влегуваме внатре и сада - спектакл. Свако вече црно мече пичи во сред Фулда!!! Ја слушам песнава, и ми се враќа филмот 4 години уназад на новогодишната забава на Сивус, кога Зоки му го утрапи цедето со дотичната песна на диџејот, а овој со цел памет ја пушти. И не смееше да ја прекине песната додека не заврши. Кога ме фати една носталгијаааааа, па после 2 минути кога ми текна дека тригерот за носталгијава е турбофолк, си ги собравме парталите и се упативме накај дома. Дома си пуштив една доза од Секс Пистолс, чисто да се деконтаминирам….